වැඩසටහන් සහ ක්‍රියාකාරකම්

සබරලේ ශ්‍රී ගුණරතන දහම් පාසලේ දුවා දරුවන්ගේ ආධ්‍යාත්මික ගුණවර්ධනය උදෙසා සෑම වසරකම වෙසක් පුන් පොහෝ දින අති උත්කර්ෂවත් අයුරින් සීල සමාදාන සහ භාවනා වැඩසටහන් මාලාවක් පවත්වනු ලබයි. දරුවන්ගේ වයස් මට්ටම්වලට ගැළපෙන අයුරින් දහම් දැනුම සහ ප්‍රතිපත්ති පූජාවන් හුරු කරවීම මෙහි ප්‍රධාන අරමුණ වන අතර, ප්‍රාථමික අංශය සහ ජ්‍යෙෂ්ඨ අංශය වෙන වෙනම කණ්ඩායම් ලෙස මෙදින සීල සමාදාන කටයුතු වල නිරත වේ. දවස පුරා පැවැත්වෙන ධර්ම දේශනා සහ භාවනා වැඩසටහන් වලට අමතරව, කුඩා දරුවන්ගේ දහම් පිපාසය සංසිඳුවීම සඳහා දර්ශන ඇසුරින් ජාතක කතා පෙන්වීමේ සුවිශේෂී වැඩසටහනක් ද ක්‍රියාත්මක වේ. ​ මෙම පින්කම් මාලාව සාර්ථක කර ගැනීම සඳහා දානමය දායකත්වය ලබා දෙන පිරිස ද කෘතවේදීව සිහිපත් කළ යුතුය. ඒ අනුව, උදෑසන පින්කම් සඳහා විහාරස්ථානයේ ගරු ස්වාමීන් වහන්සේලා සහ දහම් පාසල් ආචාර්ය මණ්ඩලය දායකත්වය දක්වන අතර, දහවල් දානමය පුණ්‍යකර්මය සඳහා දහම් පාසලේ ආදරණීය දෙමාපියන් සිය ශ්‍රමයෙන් හා ධනයෙන් සක්‍රීයව දායක වෙති. මෙම සාමූහික කැපවීම තුළින් දරුවන් තුළ ශ්‍රද්ධාව සහ බෞද්ධ සිරිත් විරිත් පිළිබඳ මනා අවබෝධයක් ඇති කරන අතර, වෙසක් උත්සවයේ නියම අර්ථය වන ප්‍රතිපත්ති පූජාවට දරුවන් යොමු කිරීම අපගේ මූලික බලාපොරොත්තුවයි.

​දහම් පාසල් දුවා දරුවන්ගේත් ආචාර්ය මණ්ඩලයේත් ශ්‍රද්ධාව සහ නිර්මාණශීලීත්වය විදහා දක්වන අති උත්කර්ෂවත් ආගමික මංගල්‍යයකි. මෙහිදී සෑම ශ්‍රේණියකින්ම ඉදිරිපත් කරන කණ්ඩායම් 22ක්, ශිෂ්‍ය නායක මණ්ඩලයේ සහ ආචාර්ය මණ්ඩලයේ කණ්ඩායම් ද ඇතුළුව සමස්ත බැති ගී කණ්ඩායම් 25ක් බුදුගුණ ගායනාවෙන් මුළු පින්බිමම ඒකාලෝක කරන අතර, ප්‍රාථමික අංශයේ සෑම දරුවෙකුම රැගෙන එන අලංකාර වෙසක් පහන් කූඩුවලින් විහාරස්ථානය අලංකාරවත් වේ. ඊට අමතරව සම්බුදු තෙමඟුල, ප්‍රථම ධර්ම සංගායනාව සහ විවිධ ජාතක කතා ඇසුරින් දරුවන් විසින්ම නිර්මාණය කරනු ලබන සජීවී ආකෘති ද සැදැහැවතුන්ගේ වන්දනාවට හා නිරීක්ෂණයට විවෘත වන අතර, මෙම උතුම් පුණ්‍යකර්මයට සමගාමීව දහම් පාසලේ 9 ශ්‍රේණියේ දුවා දරුවන් සහ දෙමාපියන් එකමුතුව වාර්ෂිකව සංවිධානය කරනු ලබන දන්සල, පැමිණෙන දහස් සංඛ්‍යාත ජනතාවගේ කුසගින්න නිවන උදාර පරිත්‍යාගශීලී මෙහෙවරක් බවට පත්ව තිබේ